ಶ್ರೀ ರಾಮನಗರದಲ್ಲಿ ‘ಚರಂಡಿ ನೀರೇ’ ಕುಡಿಯುವ ನೀರು!

ಜಾಹೀರಾತು

In Sri Ramanagara, 'sewage water' is the drinking water!

ಶ್ರೀ ರಾಮನಗರದಲ್ಲಿ ‘ಚರಂಡಿ ನೀರೇ’ ಕುಡಿಯುವ ನೀರು!

ಜಾಹೀರಾತು

ಸಾರ್ವಜನಿಕರಷ್ಟೇ ಅಲ್ಲ, ಜಾನುವಾರುಗಳ ಜೀವಕ್ಕೂ ಅಪಾಯ – ಆರೋಪಗಳ ನಡುವೆ ಕ್ರಮಕ್ಕೆ ಮುಂದಾದ ಅಧಿಕಾರಿಗಳು

ಗಂಗಾವತಿ, ಏಪ್ರಿಲ್ 14:ಸರ್ಕಾರ ಕೋಟ್ಯಾಂತರ ರೂಪಾಯಿ ವೆಚ್ಚ ಮಾಡಿ ಶುದ್ಧ ಕುಡಿಯುವ ನೀರಿನ ಯೋಜನೆಗಳನ್ನು ಜಾರಿಗೆ ತಂದಿದ್ದರೂ, ಕೊಪ್ಪಳ ಜಿಲ್ಲೆಯ ಗಂಗಾವತಿ ತಾಲೂಕಿನ ಶ್ರೀ ರಾಮನಗರದಲ್ಲಿ ಜನರು ಮಾತ್ರವಲ್ಲ, ಜಾನುವಾರುಗಳಿಗೂ ಅಸ್ವಚ್ಛ ಚರಂಡಿ ನೀರೇ ಅವಲಂಬನೆಯಾಗಿರುವುದು ಆತಂಕಕಾರಿ ಬೆಳವಣಿಗೆಯಾಗಿ ಹೊರಹೊಮ್ಮಿದೆ.
ಶ್ರೀ ರಾಮನಗರದ 6ನೇ ವಾರ್ಡಿನಲ್ಲಿ ಕುಡಿಯುವ ನೀರಿನ ಸಮಸ್ಯೆ ತೀವ್ರಗೊಂಡಿದ್ದು, ಸ್ಥಳೀಯ ಕೆರೆಗೆ ನೇರವಾಗಿ ಶೌಚಾಲಯ ಹಾಗೂ ಚರಂಡಿ ನೀರು ಸೇರುತ್ತಿರುವುದಾಗಿ ಸಾರ್ವಜನಿಕರು ಗಂಭೀರ ಆರೋಪ ಮಾಡಿದ್ದಾರೆ. ಇದರ ಪರಿಣಾಮವಾಗಿ ಕೆರೆಯ ನೀರು ಸಂಪೂರ್ಣ ಮಾಲಿನ್ಯಗೊಂಡಿದ್ದು, ಅದನ್ನೇ ಬಳಕೆ ಮಾಡಬೇಕಾದ ದುಸ್ಥಿತಿ ಜನರ ಮುಂದಿದೆ.
ಸ್ಥಳೀಯರು ಹಲವು ಬಾರಿ ಗ್ರಾಮ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದರೂ ಯಾವುದೇ ಪರಿಣಾಮಕಾರಿ ಕ್ರಮ ಕೈಗೊಳ್ಳಲಾಗಿಲ್ಲವೆಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಬೇಸಿಗೆ ಆರಂಭವಾದ ಹಿನ್ನೆಲೆಯಲ್ಲಿ ನೀರಿನ ಅಭಾವ ಮತ್ತಷ್ಟು ಹೆಚ್ಚಾಗಿ, ಸಮಸ್ಯೆ ಗಂಭೀರವಾಗಿದೆ.
ಈ ಮಾಲಿನ್ಯದಿಂದ ಕೆರೆಯಲ್ಲಿ ಮೀನುಗಳು ಸತ್ತು ಹೋಗುತ್ತಿರುವುದಲ್ಲದೆ, ದುರ್ಗಂಧದಿಂದ ಪರಿಸರ ಅಸ್ವಚ್ಛವಾಗಿದೆ. ಜಲಜನ್ಯ ರೋಗಗಳು ಹರಡುವ ಭೀತಿ ಹೆಚ್ಚಿದ್ದು, ಕಾಲೆರಾ, ಟೈಫಾಯ್ಡ್ ಸೇರಿದಂತೆ ಸಾಂಕ್ರಾಮಿಕ ರೋಗಗಳು ಹರಡುವ ಸಾಧ್ಯತೆ ಇದೆ ಎಂದು ಸ್ಥಳೀಯರು ಆತಂಕ ವ್ಯಕ್ತಪಡಿಸಿದ್ದಾರೆ.
ಇನ್ನೊಂದು ಆಘಾತಕಾರಿ ಅಂಶವೆಂದರೆ, ಕೆಲವು ಮನೆಗಳಲ್ಲಿ ಅನಧಿಕೃತವಾಗಿ ಪೈಪ್‌ಗಳನ್ನು ಅಳವಡಿಸಿ ಶೌಚಾಲಯದ ನೀರನ್ನು ನೇರವಾಗಿ ಕುಡಿಯುವ ನೀರಿನ ಕಾಲುವೆಗೆ ಹರಿಬಿಡುತ್ತಿರುವುದಾಗಿ ಆರೋಪ ಕೇಳಿಬಂದಿದೆ. ಈ ಕುರಿತು ಅನೇಕ ಬಾರಿ ಅಧಿಕಾರಿಗಳಿಗೆ ಮಾಹಿತಿ ನೀಡಿದರೂ ಸೂಕ್ತ ಕ್ರಮ ಕೈಗೊಳ್ಳದಿರುವುದು ಸಾರ್ವಜನಿಕರಲ್ಲಿ ಅಸಮಾಧಾನಕ್ಕೆ ಕಾರಣವಾಗಿದೆ.
“ನಮಗೆ ಮಾತ್ರವಲ್ಲ, ನಮ್ಮ ಜಾನುವಾರುಗಳಿಗೂ ಶುದ್ಧ ನೀರು ಬೇಕು. ಈ ಅಸ್ವಚ್ಛ ನೀರನ್ನು ಕುಡಿಯುವುದರಿಂದ ಜಾನುವಾರುಗಳಿಗೂ ರೋಗಗಳು ಹರಡುವ ಭೀತಿ ಇದೆ,” ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಪ್ರಾಣಿ-ಪಕ್ಷಿಗಳು ಇದೇ ನೀರನ್ನು ಕುಡಿಯುವುದರಿಂದ ಅವುಗಳ ಸಾವಿನ ಸಾಧ್ಯತೆಯೂ ಹೆಚ್ಚಿದೆ ಎಂದು ಅವರು ಎಚ್ಚರಿಸಿದ್ದಾರೆ.
ಸ್ಥಳೀಯರಾದ ವಿಷ್ಣುಕುಮಾರ್, ಚಂದ್ರಶೇಖರ್, ದೊಡ್ಡದುರ್ಗಪ್ಪ, ದುರ್ಗೇಶ್, ಕಿರಣ್ ರಾಠೋಡ್, ಗುರುರಾಜ್ ಜಾದವ್, ಸುನಿಲ್ ರಾಥೋಡ್, ಗೋಪಾಲ್ ರಾಟೋಡ್ ಹಾಗೂ ಚಂದ್ರಕಾಂತ್ ಜಾದವ್ ಸೇರಿದಂತೆ ಹಲವರು ತಕ್ಷಣ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದ್ದು, ಸಮಸ್ಯೆ ಪರಿಹರಿಸದಿದ್ದರೆ ನ್ಯಾಯಾಲಯದ ಮೊರೆ ಹೋಗುವುದಾಗಿ ಎಚ್ಚರಿಕೆ ನೀಡಿದ್ದಾರೆ.
ತಕ್ಷಣ ಕ್ರಮಕ್ಕೆ ಆಗ್ರಹ
ಕೆರೆಗೆ ಚರಂಡಿ ನೀರು ಸೇರುವ ಮಾರ್ಗಗಳನ್ನು ತಕ್ಷಣ ಬಂದ್ ಮಾಡಬೇಕು
ಅನಧಿಕೃತ ಪೈಪ್‌ಗಳನ್ನು ತೆರವುಗೊಳಿಸಿ ಸಂಬಂಧಪಟ್ಟವರ ಮೇಲೆ ಕಾನೂನು ಕ್ರಮ ಕೈಗೊಳ್ಳಬೇಕು
ಕೆರೆಯನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಿ ಶುದ್ಧ ನೀರು ತುಂಬುವ ವ್ಯವಸ್ಥೆ ಮಾಡಬೇಕು
ಸಾರ್ವಜನಿಕರಿಗೆ ಸುರಕ್ಷಿತ ಕುಡಿಯುವ ನೀರು ಪೂರೈಕೆ ಖಚಿತಪಡಿಸಬೇಕು
ಅಧಿಕಾರಿಗಳ ಸ್ಪಷ್ಟನೆ –
ಈ ಆರೋಪಗಳ ಕುರಿತು ಪ್ರತಿಕ್ರಿಯೆ ನೀಡಿದ ಗ್ರಾಮ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ ಹುಷಾರಾಣಿ, ಸಮಸ್ಯೆಯನ್ನು ಗಂಭೀರವಾಗಿ ಪರಿಗಣಿಸಿ ಈಗಾಗಲೇ ಕ್ರಮ ಕೈಗೊಳ್ಳಲಾಗಿದೆ ಎಂದು ತಿಳಿಸಿದ್ದಾರೆ.
“ಕಾಲುವೆಗೆ ಚರಂಡಿ ನೀರು ಬಿಡದಂತೆ ಕಟ್ಟುನಿಟ್ಟಿನ ಸೂಚನೆ ನೀಡಿದ್ದೇವೆ. ನಿಯಮ ಉಲ್ಲಂಘನೆ ಮಾಡಿದವರಿಗೆ ನೋಟಿಸ್ ಜಾರಿ ಮಾಡಲಾಗಿದೆ. ಪ್ರತಿಯೊಬ್ಬರಿಗೂ ಕಾನೂನು ಎಚ್ಚರಿಕೆ ನೀಡಿದ್ದೇವೆ,” ಎಂದು ಅವರು ಹೇಳಿದರು.
“ಈ ಕೆರೆಯ ನೀರನ್ನು ಕುಡಿಯಲು ಬಳಸಬಾರದು. ಕೇವಲ ಇತರ ಬಳಕೆಗಳಿಗೆ ಮಾತ್ರ ಉಪಯೋಗಿಸಬೇಕೆಂದು ಸಾರ್ವಜನಿಕರಿಗೆ ಸೂಚನೆ ನೀಡಲಾಗಿದೆ. ಶುದ್ಧ ಕುಡಿಯುವ ನೀರಿಗಾಗಿ ಆರ್‌ಒ ಪ್ಲಾಂಟ್ ಯೋಜನೆಯನ್ನು ರೂಪಿಸಿದ್ದೇವೆ,” ಎಂದು ವಿವರಿಸಿದರು.
ಇದಲ್ಲದೆ, “ಪರ್ಯಾಯ ವ್ಯವಸ್ಥೆಯಾಗಿ ಸ್ಥಳೀಯ ಬೋರ್‌ವೆಲ್‌ಗಳಿಂದ ಕೆರೆಗಳನ್ನು ತುಂಬಿಸುವ ಕಾರ್ಯಕ್ಕೂ ಮುಂದಾಗುತ್ತಿದ್ದೇವೆ. ಈ ಕುರಿತು ಉನ್ನತ ಮಟ್ಟದ ಅಧಿಕಾರಿಗಳಿಗೆ ಪತ್ರ ವ್ಯವಹಾರ ನಡೆಸಲಾಗಿದೆ,” ಎಂದು ತಿಳಿಸಿದ್ದಾರೆ.
ಸ್ಥಳೀಯರಿಂದ ಬಂದಿರುವ ಆರೋಪಗಳ ಹಿನ್ನೆಲೆ, ಈಗಾಗಲೇ ಸಂಬಂಧಪಟ್ಟವರಿಗೆ ನೋಟಿಸ್ ನೀಡಲಾಗಿದೆ ಎಂದು ತಿಳಿಸಿರುವ ಅಧಿಕಾರಿಗಳು, ನಿಯಮ ಉಲ್ಲಂಘನೆ ಮಾಡಿದವರ ವಿರುದ್ಧ ಮುಂದಿನ ದಿನಗಳಲ್ಲಿ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಿದ್ದಾರೆ.
ಜಾನುವಾರುಗಳ ಹಿತಕ್ಕೂ ಪ್ರಶ್ನೆ
ಸರ್ಕಾರ ಜಾನುವಾರುಗಳ ಹಿತಕ್ಕಾಗಿ ಅನೇಕ ಯೋಜನೆಗಳನ್ನು ಜಾರಿಗೆ ತಂದಿದ್ದರೂ, ತಳಮಟ್ಟದಲ್ಲಿ ಅವುಗಳಿಗೂ ಶುದ್ಧ ನೀರು ಸಿಗದಿರುವುದು ಗಂಭೀರ ವಿಚಾರವಾಗಿದೆ. “ಬಳಕೆಗೆ ಮಾತ್ರ” ಎಂದು ನೀಡಲಾಗುತ್ತಿರುವ ಅಸ್ವಚ್ಛ ನೀರು ಪ್ರಾಣಿ-ಪಕ್ಷಿಗಳ ಆರೋಗ್ಯಕ್ಕೂ ಅಪಾಯಕಾರಿಯಾಗಿದ್ದು, ಸಾಂಕ್ರಾಮಿಕ ರೋಗ ಹರಡುವ ಭೀತಿ ಹೆಚ್ಚಿಸಿದೆ ಎಂದು ಸ್ಥಳೀಯರು ಆರೋಪಿಸಿದ್ದಾರೆ.
ರಾಜ್ಯ ಮಟ್ಟದ ಪ್ರಶ್ನೆಯಾಗಿ ಬೆಳೆಯುತ್ತಿರುವ ಸಮಸ್ಯೆ
ಶ್ರೀ ರಾಮನಗರದ ಈ ಘಟನೆ, ರಾಜ್ಯದ ಕುಡಿಯುವ ನೀರಿನ ಯೋಜನೆಗಳ ಜಾರಿಗೆ ಸಂಬಂಧಿಸಿದ ದೊಡ್ಡ ಪ್ರಶ್ನೆಯನ್ನು ಎತ್ತಿದೆ. ಕೋಟ್ಯಾಂತರ ಹಣ ವೆಚ್ಚವಾಗುತ್ತಿದ್ದರೂ, ತಳಮಟ್ಟದಲ್ಲಿ ಜನರು ಮತ್ತು ಜಾನುವಾರುಗಳಿಗೆ ಶುದ್ಧ ನೀರು ಸಿಗದಿರುವುದು ಆಡಳಿತದ ವೈಫಲ್ಯವನ್ನು ಸ್ಪಷ್ಟಪಡಿಸುತ್ತದೆ.
ಒಂದೆಡೆ ಸಾರ್ವಜನಿಕರ ಆಕ್ರೋಶ, ಮತ್ತೊಂದೆಡೆ ಅಧಿಕಾರಿಗಳ ಕ್ರಮ – ಈ ನಡುವೆ ಶುದ್ಧ ನೀರಿಗಾಗಿ ಜನರ ಹೋರಾಟ ಮುಂದುವರಿದಿದೆ.
(ಮುಖಪುಟ ವಿಶೇಷ ವರದಿ)
. ಚಂದ್ರಶೇಖರ್. ದೊಡ್ಡದುರ್ಗಪ್ಪ. ದುರ್ಗೇಶ್. ಕಿರಣ್ ರಾಠೋಡ್. ಗುರುರಾಜ್ ಜಾದವ್. ಸುನಿಲ್ ರಾಥೋಡ್. ಗೋಪಾಲ್ ರಾಟೋಡ್. ಚಂದ್ರಕಾಂತ್ ಜಾದವ್
ವಿಷ್ಣುಕುಮಾರ್ ಹೇಳಿಕೆ 4 5 ವರ್ಷಗಳಿಂದ ಬೇಸಿಗೆ ಬಂದರೆ ಸಾಕು ಆರನೇ ವಾರ್ಡಿನಲ್ಲಿ ಹಿಂದುಳಿದ ವರ್ಗದ ಎಸ್ಸಿ ಎಸ್ಟಿ ಜನಾಂಗದ ಜನರೇ ವಾಸವಿದ್ದೇವೆ ಇಂದಿನ ಅಧಿಕಾರಿಗಳು ಒಂದನೇ ವಾರ್ಡಿನ ಜನರಿಗೆ ನೀಡುವಂತಹ ಶುದ್ಧವಾದ ಕೆರೆಯ ನೀರು ಪೂರೈಸುವಲ್ಲಿ ಅತಿ ಜಾಗೃತರಾಗಿ ಮುಂದುವರಿತಾರೆ ಏಕೆಂದರೆ ಉಳ್ಳವರು ಹೆಚ್ಚಾಗಿ ಇರುವಂತಹ ವರ್ಡ್ ಆಗಿದೆ ಆರನೇ ವಾರ್ಡಿನ ಹಿಂದುಳಿದ ವರ್ಗದ ಜನರಿದ್ದಾರೆ ಎಂದು ಭಾವಿಸಿ ಇಲ್ಲಿನ ಜನರಿಗೆ ಶುದ್ಧವಾದ ನೀರು ಕೊಡಲು ಮುಂದಾಗುತ್ತಿಲ್ಲ ಧೋರಣೆ ಎಂದು ನಾವು ಭಾವಿಸುತ್ತೇವೆ ಅಧಿಕಾರಿಗಳೇ ಕಾರ್ಯ ತನ್ನ ಮಾಡುತ್ತಿದ್ದಾರೆ ಇಲ್ಲಿನ ಜಿಲ್ಲಾಡಳಿತ ಸಂಪೂರ್ಣವಾಗಿ ವಿಫಲವಾಗಿದೆ ಅನೇಕ ಬಾರಿ 4 5 ವರ್ಷಗಳಿಂದ ನಾವು ಈ ಕುರಿತು ಮಾಹಿತಿ ನೀಡಿದರು ಕೂಡ ಇಲ್ಲಿಯವರೆಗೂ ಕ್ರಮ ಕೈಗೊಳ್ಳದೆ ಇರುವುದು ವಿಪರ್ಯಾಸ ಮುಂದಿನ ಆದಿ ಹೋರಾಟದ ಆದಿ ಇಂದಿನ ಜನರಿಗೆ ಮತ್ತು ಪ್ರಾಣಿಗಳಿಗೆ ಆರೋಗ್ಯದಲ್ಲಿ ಏನಾದರೂ ವ್ಯತ್ಯಾಸವಾದರೆ ಗ್ರಾಮ ಪಂಚಾಯಿತಿ ಮುಂಭಾಗವೇ ಪ್ರತಿಭಟನೆಗೆ ಮುಂದಾಗುತ್ತೇವೆ ಸ್ಥಳೀಯರು ಆರೋಪಿಸಿದ್ದಾರೆ