Demand to halt park construction work: Public submits memorandum to Deputy Commissioner
Opposition to food court construction in Gangavathi; demand for a comprehensive probe into land-use change, approvals, and documentation.
ಉದ್ಯಾನವನದಲ್ಲಿ ಕಾಮಗಾರಿ ಸ್ಥಗಿತಕ್ಕೆ ಆಗ್ರಹ: ಜಿಲ್ಲಾಧಿಕಾರಿಗೆ ಸಾರ್ವಜನಿಕರ ಮನವಿ
ಗಂಗಾವತಿಯಲ್ಲಿ ಫುಡ್ ಕೋರ್ಟ್ ನಿರ್ಮಾಣಕ್ಕೆ ವಿರೋಧ; ಜಾಗದ ಬಳಕೆ ಬದಲಾವಣೆ, ಅನುಮೋದನೆ ಹಾಗೂ ದಾಖಲೆಗಳ ಸಮಗ್ರ ತನಿಖೆಗೆ ಒತ್ತಾಯ
ಗಂಗಾವತಿ, ಆಗಸ್ಟ್ 21: ನಗರದ ಸಾರ್ವಜನಿಕ ಉದ್ಯಾನವನದ ಒಳಭಾಗದಲ್ಲಿ ನಡೆಯುತ್ತಿರುವ ಕಾಮಗಾರಿಯನ್ನು ತಕ್ಷಣ ಸ್ಥಗಿತಗೊಳಿಸಿ, ಉದ್ಯಾನವನದ ಜಾಗವನ್ನು ಫುಡ್ ಕೋರ್ಟ್ ಅಥವಾ ಬೀದಿ ಬದಿ ವ್ಯಾಪಾರ ಚಟುವಟಿಕೆಗಳಿಗೆ ಬಳಸಲು ಕೈಗೊಂಡಿರುವ ಕ್ರಮಗಳ ಕುರಿತು ಸಮಗ್ರ ತನಿಖೆ ನಡೆಸಬೇಕು ಎಂದು ಗಂಗಾವತಿ ನಗರದ ಸಾರ್ವಜನಿಕರ ಪರವಾಗಿ ಜೋಗಿನ್ ರಮೇಶ ಅವರು ಜಿಲ್ಲಾಧಿಕಾರಿಗಳು ಸೇರಿದಂತೆ ಸಂಬಂಧಪಟ್ಟ ಮೇಲಾಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದಾರೆ.
ಗಂಗಾವತಿ ನಗರದ ಪ್ರಮುಖ ಸಾರ್ವಜನಿಕ ಉದ್ಯಾನವನವು ಸಾರ್ವಜನಿಕರ ಹಸಿರು ವಲಯ, ವಿಶ್ರಾಂತಿ, ಮಕ್ಕಳ ಆಟ ಹಾಗೂ ವಯೋವೃದ್ಧರ ಬಳಕೆಗೆ ಮೀಸಲಾಗಿದ್ದು, ಇಂತಹ ಜಾಗದ ಒಳಭಾಗದಲ್ಲಿ ಮಣ್ಣು ಅಗೆದು ಚರಂಡಿ ಅಥವಾ ಕಾಲುವೆ ಮಾದರಿಯ ಕಾಮಗಾರಿ ನಡೆಸಲಾಗುತ್ತಿದೆ ಎಂದು ಮನವಿಯಲ್ಲಿ ಆರೋಪಿಸಲಾಗಿದೆ.
ಉದ್ಯಾನವನದ ಒಂದು ಭಾಗವನ್ನು ಬೀದಿ ಬದಿ ವ್ಯಾಪಾರಿಗಳಿಗೆ ಅನುಕೂಲವಾಗುವಂತೆ ಫುಡ್ ಕೋರ್ಟ್ ಅಥವಾ ಆಹಾರ ಮಳಿಗೆಗಳ ಪ್ರದೇಶವಾಗಿ ಅಭಿವೃದ್ಧಿಪಡಿಸುವ ಉದ್ದೇಶವಿದೆ ಎಂಬ ಮಾಹಿತಿ ಸಾರ್ವಜನಿಕ ವಲಯದಲ್ಲಿ ಹರಿದಾಡುತ್ತಿದೆ ಎಂದು ಮನವಿಯಲ್ಲಿ ತಿಳಿಸಲಾಗಿದೆ.
ಸಾರ್ವಜನಿಕ ಉದ್ಯಾನವನದ ಜಾಗವನ್ನು ವಾಣಿಜ್ಯ ಉದ್ದೇಶಕ್ಕೆ ಬಳಸುವ ಮುನ್ನ, ಮೂಲ ದಾಖಲೆಗಳಲ್ಲಿ ಜಾಗದ ಉದ್ದೇಶವೇನು, ಬಳಕೆ ಬದಲಾವಣೆಗೆ ಯಾವ ಪ್ರಾಧಿಕಾರದ ಅನುಮತಿ ಅಗತ್ಯ ಹಾಗೂ ನಗರಸಭೆಯ ನಿರ್ಣಯವಿದೆಯೇ ಎಂಬುದನ್ನು ಪರಿಶೀಲಿಸಬೇಕು ಎಂದು ಒತ್ತಾಯಿಸಲಾಗಿದೆ.
ಬೀದಿ ಬದಿ ವ್ಯಾಪಾರಿಗಳ ಜೀವನೋಪಾಯಕ್ಕೆ ರಕ್ಷಣೆ ನೀಡುವುದು ಅಗತ್ಯವಾದರೂ, ಅದಕ್ಕಾಗಿ ಸಾರ್ವಜನಿಕ ಉದ್ಯಾನವನ, ಹಸಿರು ಪ್ರದೇಶ ಅಥವಾ ಮಕ್ಕಳ ಆಟದ ಜಾಗವನ್ನು ಹಾನಿಗೊಳಿಸುವುದು ಸರಿಯಾದ ಕ್ರಮವಲ್ಲ ಎಂದು ಮನವಿದಾರರು ಅಭಿಪ್ರಾಯಪಟ್ಟಿದ್ದಾರೆ.
ಬೀದಿ ವ್ಯಾಪಾರಿಗಳಿಗೆ ಪರ್ಯಾಯ ಜಾಗಕ್ಕೆ ಒತ್ತಾಯ
Street Vendors (Protection of Livelihood and Regulation of Street Vending) Act, 2014ರ ನಿಯಮಗಳ ಅನ್ವಯ ಬೀದಿ ವ್ಯಾಪಾರಿಗಳಿಗೆ ಸಮೀಕ್ಷೆ ನಡೆಸಿ, ವೆಂಡಿಂಗ್ ಪ್ರಮಾಣಪತ್ರ, ವೆಂಡಿಂಗ್ ವಲಯ ಹಾಗೂ Town Vending Committee ಶಿಫಾರಸಿನ ಆಧಾರದ ಮೇಲೆ ಸೂಕ್ತ ಪರ್ಯಾಯ ಸ್ಥಳವನ್ನು ಗುರುತಿಸಬೇಕು ಎಂದು ಮನವಿಯಲ್ಲಿ ಆಗ್ರಹಿಸಲಾಗಿದೆ.
ರಸ್ತೆ ವಿಸ್ತರಣೆ ಸೇರಿದಂತೆ ವಿವಿಧ ಕಾರಣಗಳಿಂದ ಉದ್ಯಾನವನದ ವಿಸ್ತೀರ್ಣ ಈಗಾಗಲೇ ಕಡಿಮೆಯಾಗಿರುವ ಬಗ್ಗೆ ಸಾರ್ವಜನಿಕರಲ್ಲಿ ಅಸಮಾಧಾನವಿದ್ದು, ಉಳಿದ ಜಾಗವನ್ನೂ ಮತ್ತಷ್ಟು ವಾಣಿಜ್ಯ ಚಟುವಟಿಕೆಗಳಿಗೆ ಬಳಸಿದರೆ ನಗರದಲ್ಲಿ ಸಾರ್ವಜನಿಕರಿಗೆ ಲಭ್ಯವಿರುವ ಹಸಿರು ಪ್ರದೇಶ ಕಡಿಮೆಯಾಗಲಿದೆ ಎಂದು ಆತಂಕ ವ್ಯಕ್ತಪಡಿಸಲಾಗಿದೆ.
ಸ್ಥಳ ಪರಿಶೀಲನೆ ನಡೆಸುವಂತೆ ಒತ್ತಾಯ
ಜಿಲ್ಲಾಧಿಕಾರಿಗಳ ನೇತೃತ್ವದಲ್ಲಿ ಅಥವಾ ಹಿರಿಯ ಅಧಿಕಾರಿಗಳ ತಂಡದಿಂದ ಸ್ಥಳ ಪರಿಶೀಲನೆ ನಡೆಸಿ, ಉದ್ಯಾನವನದ ಒಟ್ಟು ವಿಸ್ತೀರ್ಣ, ಮೂಲ ನಕ್ಷೆ, ಪ್ರಸ್ತುತ ನಡೆಯುತ್ತಿರುವ ಕಾಮಗಾರಿಯ ಉದ್ದೇಶ, ಪಡೆದಿರುವ ಅನುಮತಿಗಳು, ನಗರಸಭೆಯ ನಿರ್ಣಯ, ಅಂದಾಜು ಮತ್ತು ಕಾರ್ಯಾದೇಶ ಸೇರಿದಂತೆ ಎಲ್ಲಾ ದಾಖಲೆಗಳನ್ನು ಪರಿಶೀಲಿಸಬೇಕು ಎಂದು ಮನವಿ ಮಾಡಲಾಗಿದೆ.
ಉದ್ಯಾನವನದ ಜಾಗದಲ್ಲಿ ಹಿಂದೆ ನಿರ್ಮಿಸಲಾಗಿರುವ ಶೌಚಾಲಯ ಹಾಗೂ ಇತರೆ ಶಾಶ್ವತ ನಿರ್ಮಾಣಗಳು ಯಾವ ಯೋಜನೆಯಡಿ ನಡೆದಿವೆ, ಅವುಗಳಿಗೆ ಯಾವ ಅಧಿಕಾರಿಗಳಿಂದ ಅನುಮೋದನೆ ಪಡೆಯಲಾಗಿದೆ ಹಾಗೂ ಯಾವ ನಿಧಿಯಿಂದ ಹಣ ಬಿಡುಗಡೆ ಮಾಡಲಾಗಿದೆ ಎಂಬ ಬಗ್ಗೆಯೂ ತನಿಖೆ ನಡೆಸಬೇಕು ಎಂದು ಒತ್ತಾಯಿಸಲಾಗಿದೆ.
ಮನವಿ ವಿಚಾರಣೆ ಪೂರ್ಣಗೊಳ್ಳುವವರೆಗೆ ಮಣ್ಣು ಅಗೆತ, ಕಾಂಕ್ರೀಟ್ ಕಾಮಗಾರಿ, ಚರಂಡಿ ನಿರ್ಮಾಣ ಅಥವಾ ಫುಡ್ ಕೋರ್ಟ್ಗೆ ಸಂಬಂಧಿಸಿದ ಯಾವುದೇ ಶಾಶ್ವತ ಕಾಮಗಾರಿಗೆ ತಾತ್ಕಾಲಿಕ ತಡೆ ನೀಡಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.
ದಾಖಲೆಗಳನ್ನು ಬಹಿರಂಗಪಡಿಸಲು ಆಗ್ರಹ
ಸದರಿ ಕಾಮಗಾರಿಗೆ ಸಂಬಂಧಿಸಿದ ನಗರಸಭೆಯ ನಿರ್ಣಯ, ಅಂದಾಜು, ಟೆಂಡರ್ ದಾಖಲೆ, ಕಾರ್ಯಾದೇಶ, ಹಣ ಬಿಡುಗಡೆ ವಿವರ, ನಕ್ಷೆ, ಅನುಮೋದನೆ ಹಾಗೂ Town Vending Committeeಗೆ ಸಂಬಂಧಿಸಿದ ದಾಖಲೆಗಳನ್ನು ಸಾರ್ವಜನಿಕ ಪರಿಶೀಲನೆಗೆ ಲಭ್ಯವಾಗುವಂತೆ ಮಾಡಬೇಕು ಎಂದು ಮನವಿಯಲ್ಲಿ ತಿಳಿಸಲಾಗಿದೆ.
ತನಿಖೆಯಲ್ಲಿ ಅಗತ್ಯ ಅನುಮೋದನೆಗಳಿಲ್ಲದೆ ಅಥವಾ ನಿಯಮಾನುಸಾರ ಪ್ರಕ್ರಿಯೆ ಅನುಸರಿಸದೆ ಉದ್ಯಾನವನದ ಬಳಕೆಯನ್ನು ಬದಲಾಯಿಸಿರುವುದು ಕಂಡುಬಂದರೆ ಕಾಮಗಾರಿಯನ್ನು ರದ್ದುಪಡಿಸಿ, ಉದ್ಯಾನವನವನ್ನು ಮೂಲ ಸ್ವರೂಪಕ್ಕೆ ಮರುಸ್ಥಾಪಿಸಬೇಕು ಎಂದು ಆಗ್ರಹಿಸಲಾಗಿದೆ.
ಹಾನಿಗೊಳಗಾಗಿರುವ ಹಸಿರು ಪ್ರದೇಶವನ್ನು ಪುನಃ ಅಭಿವೃದ್ಧಿಪಡಿಸುವ ಜೊತೆಗೆ, ಸಾರ್ವಜನಿಕ ಹಣದ ದುರುಪಯೋಗ ಕಂಡುಬಂದಲ್ಲಿ ಸಂಬಂಧಪಟ್ಟ ಅಧಿಕಾರಿಗಳ ವಿರುದ್ಧ ಸೂಕ್ತ ಇಲಾಖಾ ಕ್ರಮ ಕೈಗೊಳ್ಳಬೇಕು ಎಂದೂ ಮನವಿಯಲ್ಲಿ ಒತ್ತಾಯಿಸಲಾಗಿದೆ.
ಗಂಗಾವತಿ ನಗರದ ಸಾರ್ವಜನಿಕ ಉದ್ಯಾನವನವು ಮುಂದಿನ ಪೀಳಿಗೆಗೆ ಸೇರಿದ ಸಾರ್ವಜನಿಕ ಆಸ್ತಿಯಾಗಿದ್ದು, ಅದರ ಮೂಲ ಉದ್ದೇಶ ಮತ್ತು ಹಸಿರು ಸ್ವರೂಪವನ್ನು ಕಾಪಾಡುವುದು ಸ್ಥಳೀಯ ಸಂಸ್ಥೆ ಹಾಗೂ ಸಂಬಂಧಪಟ್ಟ ಇಲಾಖೆಗಳ ಜವಾಬ್ದಾರಿಯಾಗಿದೆ ಎಂದು ಮನವಿದಾರ ಜೋಗಿನ್ ರಮೇಶ ತಿಳಿಸಿದ್ದಾರೆ.v
ಗಂಗಾವತಿ ನಗರದ ಸಾರ್ವಜನಿಕ ಉದ್ಯಾನವನದ ಒಳಭಾಗದಲ್ಲಿ ನಡೆಯುತ್ತಿರುವ ಮಣ್ಣು ಅಗೆತ ಹಾಗೂ ಕಾಮಗಾರಿ ದೃಶ್ಯ.
