ಜನಸೇವೆಯ ಹಾದಿಯಲ್ಲಿ ಡಾ,ಆರ್.ಬಿ. ಪಾಟೀಲ್‌ಗೆ ಹೊಸ ಶಕ್ತಿ; ಮಹಿಳಾ–ಯುವ ಪಡೆಗೆ ಅದ್ದೂರಿ ಚಾಲನೆ!

New momentum for Dr,R.B. Patil in his journey of public service; grand launch for the women’s and youth wings!

ಜಾಹೀರಾತು

ಮಹಿಳಾ–ಯುವಶಕ್ತಿಯ ಸಂಘಟಿತ ಬಲದೊಂದಿಗೆ ಅಭಿಮಾನಿಗಳ ಪಡೆ ಮತ್ತಷ್ಟು ಬಲಿಷ್ಠ

ಸಾಧು–ಸಂತರ ಆಶೀರ್ವಾದ, ಮಹಿಳೆಯರ ಪ್ರೀತಿ, ಯುವಕರ ಉತ್ಸಾಹದ ನಡುವೆ ನೂತನ ಸಂಘಗಳ ಅದ್ದೂರಿ ಉದ್ಘಾಟನೆ

ಗಂಗಾವತಿ: ಸಮಾಜಸೇವೆ, ಧಾರ್ಮಿಕ ಸೇವೆ ಹಾಗೂ ಜನಪರ ಚಿಂತನೆಯ ಮೂಲಕ ಗುರುತಿಸಿಕೊಂಡಿರುವ ಡಾ. ಆರ್.ಬಿ. ಪಾಟೀಲ್ ಅವರ ಸಾಮಾಜಿಕ ಪಯಣಕ್ಕೆ ಇದೀಗ ಮಹಿಳಾ ಹಾಗೂ ಯುವಶಕ್ತಿಯ ಹೊಸ ಬಲ ಸೇರ್ಪಡೆಯಾಗಿದೆ.
ನಗರದ ಕನ್ನಡ ಜಾಗೃತಿ ಭವನದಲ್ಲಿ ಮಂಗಳವಾರ ನಡೆದ “ಅಭಿಮಾನಿಗಳ ಬೆಳಗು–ನೂತನ ಸಂಘಗಳ ಅವಿರ್ಭಾವ” ಕಾರ್ಯಕ್ರಮವು ಅಪಾರ ಜನಸ್ಪಂದನೆಯೊಂದಿಗೆ ಜರುಗಿತು.
ಗಡ್ಡಿ ಸುಕ್ಷೇತ್ರದ ಪೂಜ್ಯ ಶ್ರೀ ಸಂಗಮೇಶ್ವರ ತಾತನವರ ದಿವ್ಯ ಸಾನ್ನಿಧ್ಯ, ಅರಳಿಮಠದ ಶರಣಯ್ಯ ದೇವರ ಮಾರ್ಗದರ್ಶನ ಹಾಗೂ ಆರ್.ಬಿ. ಪಾಟೀಲ್ ಫೌಂಡೇಶನ್‌ನ ಸಂಯುಕ್ತ ಆಶ್ರಯದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಡಾ. ಆರ್.ಬಿ. ಪಾಟೀಲ್ ಮಹಿಳಾ ಅಭಿಮಾನಿಗಳ ಬಳಗ ಹಾಗೂ ಡಾ. ಆರ್.ಬಿ. ಪಾಟೀಲ್ ಯುವಜನ ಅಭಿಮಾನಿಗಳ ಸಂಘಕ್ಕೆ ಅಧಿಕೃತವಾಗಿ ಚಾಲನೆ ನೀಡಲಾಯಿತು.

ಈ ಮೂಲಕ ಈಗಾಗಲೇ ಸಮಾಜದಲ್ಲಿ ತನ್ನದೇ ಆದ ಗುರುತನ್ನು ಹೊಂದಿರುವ ಡಾ. ಆರ್.ಬಿ. ಪಾಟೀಲ್ ಅಭಿಮಾನಿಗಳ ಬಳಗಕ್ಕೆ ಮಹಿಳಾ ಮತ್ತು ಯುವಶಕ್ತಿಯ ಸಂಘಟಿತ ಬಲ ದೊರೆತಂತಾಗಿದೆ.
ಸೇವೆಯೇ ಸಂಘಟನೆಯ ಮೂಲಮಂತ್ರ
ಕಾರ್ಯಕ್ರಮದ ಪ್ರಾಸ್ತಾವಿಕವಾಗಿ ಡಾ. ಆರ್.ಬಿ. ಪಾಟೀಲ್ ಅಭಿಮಾನಿಗಳ ಸಂಘದ ಅಧ್ಯಕ್ಷ ಮೇಧರ್ ಗೋವಿಂದಪ್ಪ ಮಾತನಾಡಿ, ಡಾ. ಆರ್.ಬಿ. ಪಾಟೀಲ್ ಅವರು ಹಲವು ವರ್ಷಗಳಿಂದ ಯಾವುದೇ ಪ್ರತಿಫಲಾಪೇಕ್ಷೆಯಿಲ್ಲದೆ ಸಾಮಾಜಿಕ, ಧಾರ್ಮಿಕ ಹಾಗೂ ಜನಪರ ಸೇವಾ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದಾರೆ ಎಂದು ಹೇಳಿದರು.
ಬಡವರು, ನಿರ್ಗತಿಕರು ಹಾಗೂ ಆರ್ಥಿಕವಾಗಿ ಹಿಂದುಳಿದ ವರ್ಗಗಳ ಸಮಸ್ಯೆಗಳಿಗೆ ಸ್ಪಂದಿಸುವ ಮೂಲಕ ಜನರೊಂದಿಗೆ ನಿಕಟ ಸಂಪರ್ಕ ಹೊಂದಿರುವ ಅವರ ಸೇವಾ ಕಾರ್ಯಗಳನ್ನು ಮತ್ತಷ್ಟು ವಿಸ್ತರಿಸುವ ಉದ್ದೇಶದಿಂದ ಮಹಿಳಾ ಮತ್ತು ಯುವಜನ ಘಟಕಗಳನ್ನು ಆರಂಭಿಸಲಾಗಿದೆ ಎಂದರು.
ಮಹಿಳಾ ಶಕ್ತಿಯ ವಿಶ್ವಾಸ
ನೂತನ ಮಹಿಳಾ ಅಭಿಮಾನಿಗಳ ಬಳಗದ ಅಧ್ಯಕ್ಷೆ ಶಕುಂತಲಮ್ಮ ಮಾತನಾಡಿ, ಮಹಿಳೆಯರ ಸಾಮಾಜಿಕ ಹಾಗೂ ಆರ್ಥಿಕ ಸಬಲೀಕರಣಕ್ಕೆ ಡಾ. ಆರ್.ಬಿ. ಪಾಟೀಲ್ ಅವರ ಕೊಡುಗೆ ಗಮನಾರ್ಹವಾಗಿದೆ ಎಂದು ಹೇಳಿದರು.
ಸಮಾಜದ ವಿವಿಧ ವರ್ಗಗಳ ಜನರ ಸಮಸ್ಯೆಗಳಿಗೆ ಸ್ಪಂದಿಸುತ್ತಾ ಬಂದಿರುವ ಅವರ ಸೇವಾ ಮನೋಭಾವವೇ ಇಂದು ಸಾವಿರಾರು ಅಭಿಮಾನಿಗಳನ್ನು ಒಗ್ಗೂಡಿಸಿದೆ. ಮಹಿಳೆಯರನ್ನು ಸಂಘಟಿಸುವ ಮೂಲಕ ಸಮಾಜಮುಖಿ ಸೇವೆ, ಮಹಿಳಾ ಸಬಲೀಕರಣ ಹಾಗೂ ಜನಪರ ಚಟುವಟಿಕೆಗಳಿಗೆ ಆದ್ಯತೆ ನೀಡಲಾಗುವುದು ಎಂದರು.
“ಆರ್.ಬಿ. ಪಾಟೀಲ್ ಅವರಿಗೆ ಜನರ ಆಶೀರ್ವಾದ ಸಿಗಲಿ”
ಗಡ್ಡಿ ಸುಕ್ಷೇತ್ರದ ಪೂಜ್ಯ ಶ್ರೀ ಸಂಗಮೇಶ್ವರ ತಾತನವರು ಆಶೀರ್ವಚನ ನೀಡಿ, ಡಾ. ಆರ್.ಬಿ. ಪಾಟೀಲ್ ಅವರ ಜಂಗಮ ಪ್ರೀತಿ ಹಾಗೂ ಸಮಾಜಸೇವೆಯನ್ನು ಶ್ಲಾಘಿಸಿದರು.
“ಸೇವೆಗೆ ಮಿತಿ ಇಲ್ಲ. ಸಮಾಜದ ಒಳಿತಿಗಾಗಿ ಮಾಡುವ ಕಾರ್ಯವೇ ನಿಜವಾದ ಧರ್ಮ. ಡಾ. ಆರ್.ಬಿ. ಪಾಟೀಲ್ ಅವರು ಸಮಾಜಸೇವೆ ಹಾಗೂ ಧಾರ್ಮಿಕ ಕ್ಷೇತ್ರದಲ್ಲಿ ಸಲ್ಲಿಸುತ್ತಿರುವ ಸೇವೆ ನಿರಂತರವಾಗಿ ಮುಂದುವರೆಯಲಿ,” ಎಂದು ಆಶೀರ್ವದಿಸಿದರು.
ನಗರದ ಲಲಿತ ಮಹಲ್ ಎದುರು ನಿರ್ಮಾಣಗೊಳ್ಳುತ್ತಿರುವ ಶ್ರೀ ತ್ರಯಂಬಕೇಶ್ವರ ದೇವಸ್ಥಾನದ ನಿರ್ಮಾಣ ಕಾರ್ಯಕ್ಕೆ ಪ್ರತಿಯೊಬ್ಬ ಶಿವಭಕ್ತರು ಹಾಗೂ ಸಾರ್ವಜನಿಕರು ಕೈಜೋಡಿಸಬೇಕು ಎಂದು ಕರೆ ನೀಡಿದರು.
ರಾಜಕೀಯ ಪಯಣಕ್ಕೂ ಸಂತರ ಆಶೀರ್ವಾದ
ರಾಜಕೀಯ ಆಕಾಂಕ್ಷಿಯಾಗಿರುವ ಡಾ. ಆರ್.ಬಿ. ಪಾಟೀಲ್ ಅವರ ಮುಂದಿನ ರಾಜಕೀಯ ಪಯಣ ಯಶಸ್ವಿಯಾಗಲಿ ಎಂದು ಸಂಗಮೇಶ್ವರ ತಾತನವರು ಹಾರೈಸಿದರು.
“ಸಂಗಮನಾಥನ ಆಶೀರ್ವಾದ, ಸಾಧು–ಸಂತರ ಕೃಪೆ ಹಾಗೂ ಜನರ ಪ್ರೀತಿ ಡಾ. ಆರ್.ಬಿ. ಪಾಟೀಲ್ ಅವರ ಮೇಲೆ ಸದಾ ಇರಲಿ. ಮುಂದಿನ ದಿನಗಳಲ್ಲಿ ರಾಜಕೀಯವಾಗಿ ಅವರಿಗೆ ಉತ್ತಮ ಅವಕಾಶ ದೊರೆತು, ಅವರ ಸೇವೆ ಮತ್ತಷ್ಟು ವ್ಯಾಪಕವಾಗಿ ನಾಡಿನ ಜನತೆಗೆ ಸಿಗುವಂತಾಗಲಿ,” ಎಂದು ಆಶೀರ್ವಚನ ನೀಡಿದರು.
ರಕ್ಷಾಬಂಧನದ ಮೂಲಕ ಪ್ರೀತಿ–ವಿಶ್ವಾಸದ ಅಭಿವ್ಯಕ್ತಿ
ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾಗಿ ಮಹಿಳೆಯರು ಡಾ. ಆರ್.ಬಿ. ಪಾಟೀಲ್ ಅವರಿಗೆ ರಕ್ಷಾಬಂಧನ ಕಟ್ಟಿ ತಮ್ಮ ಅಭಿಮಾನ, ಪ್ರೀತಿ ಹಾಗೂ ವಿಶ್ವಾಸವನ್ನು ವ್ಯಕ್ತಪಡಿಸಿದರು.

ಮಹಿಳೆಯರ ಪ್ರೀತಿ ಹಾಗೂ ವಿಶ್ವಾಸಕ್ಕೆ ಕೃತಜ್ಞತೆ ಸಲ್ಲಿಸಿದ ಡಾ. ಆರ್.ಬಿ. ಪಾಟೀಲ್ ಅವರು, ಸಮಾಜದ ಪ್ರತಿಯೊಂದು ವರ್ಗದವರೊಂದಿಗೆ ವಿಶ್ವಾಸದ ಸಂಬಂಧವನ್ನು ಉಳಿಸಿಕೊಂಡು ಜನಸೇವೆಯಲ್ಲಿ ನಿರಂತರವಾಗಿ ತೊಡಗಿಸಿಕೊಳ್ಳುವುದಾಗಿ ತಿಳಿಸಿದರು.
ಮಹಿಳೆ–ಯುವಶಕ್ತಿ: ಸಂಘಟನೆಗೆ ಹೊಸ ವೇಗ
ಮಹಿಳೆಯರು ಹಾಗೂ ಯುವಕರು ಯಾವುದೇ ಸಮಾಜದ ಪ್ರಮುಖ ಶಕ್ತಿಯಾಗಿದ್ದು, ಈ ನಿಟ್ಟಿನಲ್ಲಿ ಡಾ. ಆರ್.ಬಿ. ಪಾಟೀಲ್ ಅಭಿಮಾನಿಗಳ ಬಳಗದ ಅಡಿಯಲ್ಲಿ ಪ್ರತ್ಯೇಕ ಮಹಿಳಾ ಹಾಗೂ ಯುವಜನ ಘಟಕಗಳ ರಚನೆ ಮಹತ್ವ ಪಡೆದಿದೆ.

ನೂತನ ಘಟಕಗಳ ಮೂಲಕ ಶಿಕ್ಷಣ, ಆರೋಗ್ಯ, ಮಹಿಳಾ ಸಬಲೀಕರಣ, ಯುವಜನ ಮಾರ್ಗದರ್ಶನ, ಧಾರ್ಮಿಕ ಸೇವೆ ಹಾಗೂ ಸಾಮಾಜಿಕ ಸೇವಾ ಕಾರ್ಯಕ್ರಮಗಳಿಗೆ ಹೆಚ್ಚಿನ ಆದ್ಯತೆ ನೀಡುವ ಉದ್ದೇಶ ಹೊಂದಲಾಗಿದೆ ಎಂದು ಸಂಘಟಕರು ತಿಳಿಸಿದರು.
ಕಾರ್ಯಕ್ರಮದಲ್ಲಿ ಶರಣಯ್ಯ ಹಿರೇಮಠ, ಆದಯ್ಯಸ್ವಾಮಿ, ವೆಂಕಟೇಶ್, ಸಹನಾ ಹಿರೇಮಠ ಸೇರಿದಂತೆ ಮಹಿಳಾ ಹಾಗೂ ಯುವಜನ ಸಂಘಟನೆಗಳ ಪದಾಧಿಕಾರಿಗಳು, ಅಭಿಮಾನಿಗಳ ಬಳಗದ ಮುಖಂಡರು, ವಿವಿಧ ಸಂಘಟನೆಗಳ ಪ್ರತಿನಿಧಿಗಳು ಹಾಗೂ ಅಪಾರ ಸಂಖ್ಯೆಯ ಮಹಿಳೆಯರು ಮತ್ತು ಯುವಕರು ಉಪಸ್ಥಿತರಿದ್ದರು

ಜಾಹೀರಾತು